ڈی پورٹ افراد کیخلاف FIR کا اندراج، پاسپورٹ منسوخی کا فیصلہ

اسلام آباد(طاہر خلیل، حافظ وسیم )ڈی پورٹ افراد کیخلاف FIRکااندراج ، پاسپورٹ منسوخی کا فیصلہ کر لیا گیا جبکہ ڈی پورٹ افراد 5 سال کے لئے بیرون ملک بھی نہیں جاسکیں گے۔وفاقی وزیر داخلہ محسن نقوی کی زیرصدارت وزارت داخلہ میں اہم اجلاس منعقد ہوا۔ اجلاس میں فیصلہ کیا گیا کہ ڈی پورٹ ہونے افراد کے خلاف ایف آئی آر کا اندراج کیا جائے گا اور پاسپورٹ بھی منسوخ کئے جائیں گے۔ اجلاس میں مزید فیصلہ ہوا کہ ڈی پورٹ ہونے والے افراد کو پانچ سال کیلئے پاسپورٹ کنٹرول لسٹ پر بھی ڈالا جائے گا۔ وزیر داخلہ محسن نقوی کی ہدایت پر پاسپورٹ کے قوانین کو مزید سخت اور بہتر بنانے کیلئے وفاقی سیکرٹری داخلہ خرم آغا کی سربراہی میں کمیٹی قائم کر دی گئی ہے۔ وزیر داخلہ محسن نقوی نے کہا کہ ڈی پورٹ ہونے والے افراد پاکستان کیلئے بین الاقوامی سطح پر شرمندگی کا باعث بن رہے ہیں، آئندہ ان سے کوئی رعایت نہیں برتی جائے گی۔