سینیٹ،سول سرونٹس ایکٹ میں ترمیم کا بل منظور، بیوروکریٹ اہل خانہ کے اثاثے ظاہر کرنے کے پابند

اسلام آباد (نمائندہ جنگ )سینیٹ نے سرکاری افسران کے اثاثوں کی تفصیلات ویب سائٹ پر ڈالنے کے سول سرونٹس ترمیمی بل 2025 کی متفقہ منظوری دیدی، بیورو کریٹ اپنے اور اہل خانہ کے اثاثے ظاہر کرنے کے پابند ہونگے ، فوجداری قوانین ترمیمی بل 2025اور لیگل پریکٹیشنرز اینڈ بار کونسلز (ترمیمی) بل 2025 بھی سینیٹ میں پیش کر دیئے گئے ، پی ٹی آئی نے لیگل پریکٹیشنرز اینڈ بار کونسلز (ترمیمی) بل کی سخت مخالفت کی، چیئرمین سینٹ نے مزید غور کیلئے دونوں بل متعلقہ قائمہ کمیٹیوں کو بھجوا دیئے، جمعرات کو ایوان بالا کے اجلاس کے دوران وفاقی وزیر قانون و انصاف اعظم نذیر تارڑ نے سول سرونٹس ترمیمی بل 2025ایوان میں پیش کیا، چیئرمین سینیٹ نے بل منظوری کیلئے ایوان میں پیش کیا جس کی ایوان نے متفقہ منظوری دیدی ، وزیر قانون و انصاف نے بتایا کہ گریڈ سترہ اور اس سے اوپر کے افسران اپنے اثاثے پیش کریں گے اور ان کے اثاثے پارلیمنٹرینز کی طرح ویب سائٹ پر ڈالے جائیں گے ۔