بجٹ میں ٹیکس حکام کو دیئے اختیارات مسترد کرتے ہیں،ایف پی سی سی آئی

کراچی (اسٹاف رپورٹر) ایف پی سی سی آئی نے وفاقی بجٹ 2025-26میں ٹیکس حکام کو دیئے گئے اختیارات پر شدید تشویش کا اظہار کرتے ہوئے کہا کہ ٹیکس آفیسرز کو ایس ایچ او جیسے اختیارات دینے کو ہم مسترد کرتے ہیں،ایف پی سی سی آئی نے فیلڈ مارشل عاصم منیر سے اپیل کی ہے کہ وہ بزنس فرینڈلی پالیسیاں بنوائیں ؛ حکومت ہماری نہیں سن رہی۔ سینئر نائب صدر ایف پی سی سی آئی ثاقب فیاض مگوں ،نائب صدر آصف سخی اور ناصر خان نے جمعرات کو فیڈریشن ہائوس کراچی میں پریس کانفرنس سے خطاب کرتے ہوئے کہا کہ ہم ٹیکس آفیسرز کو دیئے گئے اس اختیار کو بھی مسترد کرتے ہیں جو انہیں بزنس بینک اکاؤنٹس سے کاروباری افراد کی رقم نکلوانے کا اہل بناتا ہے اور بغیر نوٹس کے کاروباری اداروں پر چھاپوں کی بھی سخت مذمت کرتے ہیں- وفاقی حکومت ان سخت اقدامات کو فوری واپس لےتاکہ تاجر برادری کا اعتماد بحال ہو سکے۔ انہوں نے کہا کہ ٹیکس وصولی کا ہدف صرف اسی صورت میں حاصل کیا جا سکتا ہے جب صنعتکاروں اور برآمد کنندگان کو جامع مشاورتی عمل کے ذریعے آن بورڈ لیا جائے۔