جدہ ملتان کی پرواز کی ریاض میں لینڈنگ 72 پروازوں میں تاخیر 10 منسوخ

کراچی( افضل ندیم ڈوگر )ملک کے مختلف ایئرپورٹس کی 10پروازیں منسوخ کر دی گئیں جبکہ 72 پروازوں کی آمد اور روانگی میں تاخیر ہوئی۔ فلائٹ شیڈول کے مطابق جدہ سے ملتان کی غیر ملکی ایئر لائن کی پرواز ایس وی 800کو مسافر کی طبیعت خراب ہونے پر ریاض میں ہنگامی لینڈنگ کرائی گئی۔ دو گھنٹے بعد طیارہ منزل کیلئے روانہ ہوا۔ اسی بنا پر ملتان سے جدہ کی پرواز کی روانگی میں 4 گھنٹے تاخیر ہوئی۔ علاوہ ازیں انتظامی طور پر کراچی سے جدہ کی 6، باکو اسلام آباد اور کابل اسلام آباد کی 4 پروازیں منسوخ کی گئیں۔ اسلام آباد ایئرپورٹ کی 26 لاہور کی 17 کراچی کی 18 پشاور کی 5 ملتان سیالکوٹ اور کوئٹہ کی 6 پروازوں کی امد اور روانگی میں تاخیر ہوئی۔