ٹرمپ عاصم منیر ملاقات ،نریندر مودی غیر متعلق ہوگئے، تجزیہ کار

کراچی (ٹی وی رپورٹ)جیو کی خصوصی نشریات میں گفتگو کرتے ہوئے دفاعی تجزیہ کاروں نے کہا ہے کہ حالیہ پاکستان کے آرمی چیف اور امریکی صدر کی ملاقات کے دوررس نتائج برآمد ہوں گے ،امریکی صدر اور فیلڈمارشل عاصم منیر کی ملاقات کے بعدنریندر مودی غیر متعلق ہوگئے، پاکستان کے ساتھ امریکاکے تجارتی تعلقات اب مزیدبہتر ہوں گے،نریندرمودی کا بھی اسرائیلی وزیراعظم جیسا سیاسی جنازہ نکلنے والا ہے،ساری دنیا میں پاکستان کی عزت ہوئی ہے اورامریکی صدر نے اتنی اہمیت دی ہے پاکستا ن اورپاکستان آرمی چیف کو کہ ان کوبلایااور ان کے بار ے میں اچھی باتیں کہیں میرے خیال سے اس سے زیادہ خوشی کی بات سارے ملک کے لئے کوئی نہیں ہوسکتی ،خصوصی نشریات میں دفاعی تجزیہ کاربریگیڈیئر (ر) بابر علائو الدین،شاہد خان ، میجر جنرل (ر) زاہد محمود اور ڈاکٹرارجمند ہاشمی نے اظہار خیال کیا۔ دفاعی تجزیہ کاربریگیڈیئر (ر) بابر علائو الدین نے کہا کہ امریکی صدر اور فیلڈمارشل عاصم منیر کی ملاقات کے بعدنریندر مودی غیر متعلق ہوگئے اوردبائو میں بھی ہیں اورانڈیا کا جوسیکولر چہرہ تھا اب تبدیل ہوچکا ہے۔ ایک اور سوال کے جواب میں بابرعلائو الدین نے کہا کہ جنرل پرویزمشرف کی ملاقات کاحوالہ آپ نے دیا وہ ملاقات بطورصدر تھی اوریہ ملاقات بطور فیلڈمارشل آرمی چیف اور دوگھنٹے تک ہوئی۔