5 سال پرانی گاڑی درآمد کی جاسکے گی، IMF نے اجازت دیدی

اسلام آباد (این این آئی) آئی ایم ایف نے وزارت تجارت کو5سال پرانی گاڑی درآمد کرنے کی اجازت دیدی۔جمعہ کو سینیٹ کی قائمہ کمیٹی خزانہ کے اجلاس میں وزارت تجارت حکام نے امپورٹ پالیسی پر بریفنگ دیتے ہوئے بتایا کہ ستمبر 2025ء سے 5سال پرانی گاڑی درآمد کرنے کی اجازت ہو گی تاہم پانچ سال پرانی گاڑیوں پر 40فیصد اضافی ڈیوٹی عائد کی جائے گی۔حکام نے بتایا کہ انفرادی یا کمرشل استعمال کیلئے 3سال پرانی گاڑی منگوانے کی پابندی ختم کر دی گئی ہے ، مالی سال 2027ء کے بعد 7سال تک پرانی گاڑی بھی درآمد کرانے کی اجازت ہو گی، مالی سال 2027ء سے ہر سال اضافی ڈیوٹی میں بتدریج 10فیصد کمی کی جائے گی۔حکام نے بتایا کہ مالی سال 2027ء کے بعد درآمدی گاڑیوں پر اضافی ڈیوٹی ختم اور نارمل ڈیوٹی رہے گی۔