بھارت سفارتی سطح پر ناکام ہوگیا، پاکستان کا بیانیہ جیت گیا، بلاول بھٹو

کراچی ( اسٹاف رپورٹر)پیپلزپارٹی کے چیئرمین بلاول بھٹو زر داری نے کہا ہے کہ بھارت کی کوشش تھی کہ سفارتی سطح پر وہ پاکستان کو ناکام کروادے مگرپاکستان کامیاب رہا اور بین الاقوامی میڈیا پر پاکستان کا بیانیہ جیت گیا اور بھارت کے بیانیے کو شکست ہوئی‘بھارت کے پاس دوآپشن ہیں ‘ یا تو وہ عالمی قانون اور سندھ طاس معاہدہ مانے‘اگر نہ ماناتوپاکستان ایک اور جنگ کرے گا اورپھر 6 کے 6دریا ہمارے ہوں گے ‘پاکستان کا پانی بند کرنےکی کوشش کی تو اس کومنہ توڑ جواب دیا جائے گا۔بلاول بھٹو زرداری سفارتی مشن مکمل کرنے کے بعد جمعہ کو پاکستان واپس پہنچے جہاں کراچی ایئر پورٹ پر ان کا پرتپاک استقبال کیا گیا اور اولڈ جناح ٹرمینل پر جلسے کا بھی انعقاد کیا گیا ۔اس موقع پر بلاول بھٹو نے کہا کہ وزیراعظم اور صدر کے کہنے پر پاکستان کے وفد نے دنیا کے 4، 5 ممالک کے دورے کیے، جہاں ہم نے پاکستان، امن، کشمیر اور سندھو کا پیغام پہنچایا۔ اسی طرح دہشت گردی کے بارے میں ہمارے مؤقف ہے، وہ اقوام متحدہ، امریکا، لندن اور یورپ کے شہر برسلز میں آپ کا پیغام لے کر گیا تھا۔پاک فوج نے جس طرح انڈیا کو عبرتناک شکست دی اس پر ہم سب کو فخر ہے ‘ پاکستان نے انتھک محنت کے بعد سفارتی سطح پر بھی جنگ جیتی۔ پاکستان سچ کے ساتھ کھڑا تھا اور بھارت جھوٹ کے ساتھ کھڑا تھا۔