پاکستان عالمی دہشت گردی کے خلاف جنگ میں ہمیشہ صف اول پر رہا ہے، فیلڈ مارشل

راولپنڈی (نامہ نگار خصوصی )آرمی چیف فیلڈ مارشل سید عاصم منیر نے کہا ہے کہ پاکستان علاقائی کشیدگی کو کم کرنے اور تعاون پر مبنی سکیورٹی فریم ورک کے فروغ میں ذمہ دارانہ اور فعال کردار اداکرتا رہے گا‘پاکستان عالمی دہشت گردی کے خلاف جنگ میں ہمیشہ صف اول پر رہا ہے‘بعض علاقائی عناصردہشت گردی کو ہائبرڈوارفیئرکے طور پر استعمال کرتے ہوئے بدامنی کاباعث بن رہے ہیں ۔جمعہ کوآئی ایس پی آرسے جاری بیان کے مطابق امریکا کے سرکاری دورے کے دوران فیلڈ مارشل سید عاصم منیر نے واشنگٹن ڈی سی میں اعلیٰ امریکی سکالرز، تجزیہ کاروں، پالیسی ماہرین اور بین الاقوامی میڈیا کے نمائندوں سے تفصیلی تبادلہ خیال کیا۔فیلڈ مارشل نے علاقائی امن و استحکام کیلئے پاکستان کے غیر متزلزل عزم کو اجاگر کیا، فیلڈ مارشل نے معرکہ حق اور آپریشن بنیان مرصوص کی تفصیلات اور تجزیے پر روشنی ڈالی۔