پاکستان اور سعودی عرب کا عدالتی تعاون بڑھانے پر اتفاق

اسلام آباد(جنگ رپورٹر)سعودی سفیر نواف المالکی اورچیف جسٹس یحیٰ آفریدی کے مابین ملاقات میں پاکستان کی جانب سے سعودی عدلیہ کیساتھ ادارہ جاتی روابط کو فروغ دینے کے عزم کا اعادہ کیا گیا ،اعلامیہ کے مطابق جمعہ کے روز چیف جسٹس اور سعودی سفیر کے مابین سپریم کورٹ میں ہونیوالی ملاقات کے دوران پاکستان اور سعودی عرب کے درمیان عدالتی تعاون بڑھانے پر اتفاق کیا گیا اورسعودی وژن 2030 کے تحت عدالتی نظام میں اصلاحات پر گفتگو کی گئی ، عدالتی اکیڈمیوں کے درمیان تربیتی شراکت داری اوردونوں ممالک کے عدالتی افسران کیلئے مشترکہ تربیتی پروگراموں کے انعقاد پر غورکیا گیا ،چیف جسٹس نے کہاکہ پاکستان سعودی عرب کو قدر کی نگاہ سے دیکھتا ہے، اورسعودی عدلیہ کیساتھ ادارہ جاتی روابط کو فروغ دینے کے لیے پرعزم ہے، ملاقات میں علاقائی عدالتی کانفرنس کے انعقاد پر بھی بات چیت کی گئی ۔