شوگر ایڈوائزری بورڈ نے 5لاکھ ٹن چینی درآمد کرنے کی منظوری دیدی

اسلام آباد (اے پی پی)شوگر ایڈوائزری بورڈ نے 5لاکھ ٹن چینی درآمد کرنے کی منظوری دیدی۔ رانا تنویر حسین کا کہنا ہے کہ چینی کی قیمتوں میں استحکام کیلئے درآمد کا فیصلہ ناگزیر ہو گیا، ملک بھر میں چینی کی سپلائی میں کمی کا سامنا ہے۔وفاقی وزیر برائے غذائی تحفظ و تحقیق رانا تنویر حسین کی زیر صدارت شوگر ایڈوائزری بورڈ کا اہم اجلاس ہوا، جس میں چینی درآمد کرنے کی منظوری دی گئی، جبکہ چند روز میں درآمدی چینی سے متعلق رسمی کارروائیاں مکمل کرلی جائیں گی۔اس موقع پر بات کرتے ہوئے رانا تنویر نے کہا کہ چینی کی قلت پر قابو پانے کیلئے فوری اقدامات جاری ہیں، مزید کہنا تھا کہ درآمدی چینی کو جلد مارکیٹ میں لایا جائیگا تاکہ صارفین کو ریلیف مل سکے۔