ایران کے خلاف امریکی جارحیت بے بنیاد، ولادیمیر پیوٹن کی امریکی حملوں کی مذمت

کراچی (نیوز ڈیسک) روس کے صدر ولادیمیر پیوٹن نے کہا ہے کہ ایران کے خلاف امریکی جارحیت بے بنیاد ہے،انہوں نے امریکی حملوں کی مذمت کی اور کہا کہ ماسکو ایرانی عوام کی مدد کے لئے تیار ہے، ایران کے سپریم لیڈر خامنہ ای نے کہا ہے ایران نے حملے میں کبھی پہل کی نہ ہی کسی کی جارحیت برداشت کرے گا، انہوں نے کہا کہ اسرائیل کو سزا کا عمل جاری رہے گا۔قطر کے نشریاتی ادارے ’الجزیرہ‘ کے مطابق ماسکو میں ایرانی وزیر خارجہ عباس عراقچی سے ملاقات کے دوران روسی صدر نے کہا کہ تہران کے خلاف جارحیت بے بنیاد ہے۔خبر رساں ادارے کے مطابق ولادیمیر پیوٹن نے کہا کہ ایران کے خلاف جارحیت مکمل طور پر بلاجواز ہے، روس ایرانی عوام کو مدد فراہم کرنے کے لیے کوششیں کر رہا ہے۔دوسری جانب عباس عراقچی نے ایران پر امریکی حملوں کی مذمت کرنے پر صدر پیوٹن کا شکریہ ادا کیا اور کہا کہ روس تاریخ کی درست جانب کھڑا ہے۔انہوں نے مزید بتایا کہ ایران کے سپریم لیڈر آیت اللہ علی خامنہ ای اور صدر مسعود پزشکیاں نے پیوٹن کے لیے اپنی نیک تمنائیں اور سلام بھیجے ہیں۔