فضائی حدود کی بندش، بحرین سے والی بال ٹیموں کی واپسی میں مشکل

کراچی( نصر اقبال، اسٹاف رپورٹر)قطر میں امریکی فوجی اڈے پر میزائلوں سے حملے کے بعد بحرین نے اپنی فضائی حدود بند کردی جس کی وجہ سے بحرین میں ہونے والی ایشین نیشنز والی بال لیگ میں شریک ٹیموں کی وطن واپسی مشکل ہوگئی ہے، ایونٹ کا فائنل منگل کو پاکستان اور بحرین کے درمیان کھیلا جائے گا، پاکستانی ٹیم کے ایک آفیشل نے بتایا ہے کہ مناما میں قومی ٹیم کو ہوٹل سے باہر جانے کی اجازت نہیں ہے،سیکیورٹی بھی خاصی سخت کردی گئی ہے،کئی شہروں میں سائرن بجائے گئے ہیں،جس سے شہریوں میں خوف ہے،دوسری جانب ایونٹ کے منتظمین نے فائنل کے موقع پر تماشائیوں کے اسٹیڈیم میں داخلے کو محدود کرنے کا فیصلہ کیا ہے جبکہ دونوں ٹیموں کے ساتھ سیکیورٹی بھی بڑھادی گئی ہے، فلائٹ منسوخ ہونے سے پیر کی شب ویت نام، انڈونیشیا، آسٹریلیا، چائینز تائپے کی ٹیمیں وطن واپس نہیں لوٹ سکیں۔پاکستان سمیت ایونٹ میں شریک چار ٹیموں کے ہیڈ کوچز کا تعلق ایران سے ہے۔