اسلام آباد ہائیکورٹ میں سینئر وکیل اور جج کے درمیان دلچسپ مکالمہ

اسلام آباد (نمائند ہ جنگ) اسلام آباد ہائیکورٹ میں کیس کے التوا کیلئے آئے سینئر وکیل احسن بھون اور جج جسٹس سردار اعجاز اسحاق خان کے درمیان دلچسپ مکالمہ ہوا۔ گذشتہ روز سماعت کے موقع پر وکیل احسن بھون نے کہا کہ کیس میں التوا لینا تھا لیکن خود اس لئے آیا کہ آپ کو دیکھ لوں کیا چل رہا ہے۔ جسٹس سردار اعجاز اسحاق خان نے کہا کہ آپ نے کہا کہ آخری چند دنوں کیلئے ہیں اُن کو دیکھ آئیں۔ احسن بھون نے کہا میرا یہ مطلب نہیں تھا۔ جسٹس سردار اعجاز اسحاق نے کہا کہ آپ مجھے آخری بار عدالت میں دیکھنے آئے، آپ کا شکریہ۔ یاد رہے کہ پاکستان بار کونسل کے نمائندہ وکیل احسن بھون جوڈیشل کمیشن کے رکن ہیں۔