رانا ثناءکی سربراہی میں حکومتی وفد کی مولانا فضل الرحمٰن کی رہائش گاہ پر آمد

اسلام آباد(فاروق اقدس)وزیراعظم کے مشیر رانا ثناءاللہ کی سربراہی میں حکومتی ارکان پر مشتمل ایک وفد نے جمعیت علمائے اسلام کے سربراہ مولانا فضل الرحمٰن سے ان کی رہائش گاہ پر ملاقات کی اور ملک کی سیاسی صورتحال کے حوالے سے مختلف پہلوئوں پر غور کیا۔حکومتی وفدمیں وفاقی وزیر امیر مقام، مرتضیٰ جاوید عباسی اور ہارون محمود جبکہ جے یو آئی کے وفد میں اکرم درانی،مولانا لطف الرحمان،سینیٹر کامران مرتضیٰ،سینیٹر مولانا عطاء الرحمان اور اسعد محمود بھی موجود تھے۔یاد رہے کہ اس سے قبل وزیراعظم ہائوس میں مولانا فضل الرحمٰن کے صاحبزادے اسعد محمود نے وزیراعظم شہبازشریف سے ملاقات کی تھی ذرائع کے مطابق حکومتی وفد کی مولانا فضل الرحمان کی رہائش گاہ پر آمد اور ان سے ملاقات بھی اسی تناظر میں تھی جبکہ قیاس کیا جا رہا ہے کہ یہ ملاقات ملک کی مجموعی صورتحال کے علاوہ بالخصوص خیبرپختونخوا کی بدلتی ہوئی صورتحال کے پیش نظر مولانا فضل الرحمٰن سے مشاورت کیلئے تھی۔