پنجاب انفورسمنٹ ریگولیٹری اتھارٹی کا کل سے لاہور ڈویژن میں آپریشنز کا آغاز

لاہور(آصف محمود بٹ ) پنجاب حکومت 11 جولائی کو لاہور ڈویژن میں پنجاب انفورسمنٹ اینڈ ریگولیٹری اتھارٹی (پیرا) کا باقاعدہ آغاز کر رہی ہے جو صوبے میں شہری نظم و ضبط کی بحالی، معاشی استحصال کے خاتمے اور ریگولیٹری نظام کو مؤثر بنانے کی جانب ایک انقلابی قدم قرار دیا جا رہا ہے۔اس اہم موقع پر وزیراعلیٰ پنجاب مریم نواز ایکسپو سینٹر لاہور میں افتتاحی تقریب کی مہمانِ خصوصی ہوں گی جہاں وہ پنجاب پبلک سروس کمیشن کے ذریعے منتخب ہونے والے 400 نئے انفورسمنٹ و انویسٹی گیشن افسران سے خطاب بھی کریں گی۔ یہ افسران اس وقت پنجاب پولیس ٹریننگ سینٹر چوہنگ میں پیشہ ورانہ تربیت حاصل کر رہے ہیں جو 31 اگست تک مکمل ہو جائے گی۔’’پیرا ‘‘کو ایک خصوصی انفورسمنٹ ادارہ تصور کیا جا رہا ہے، جو حکومتی قواعد و ضوابط پر نچلی سطح پر عملدرآمد کو یقینی بنائے گا۔ ابتدائی طور پر یہ ادارہ 11جولائی سے لاہور ڈویژن کی تمام 13 تحصیلوں میں فعال ہوگا جس کے بعد مرحلہ وار دیگر ڈویژنز تک توسیع دی جائے گی۔