عمران کےبچے تحریک میں شریک ہونا چاہیںتو کوئی روک نہیں سکتا ،علی ظفر

کراچی (ٹی وی رپورٹ) جیو کے پروگرام ’’کیپٹل ٹاک‘‘ میں میزبان حامد سے گفتگو کرتے ہوئے پارلیمانی لیڈر تحریک انصاف سینیٹر بیرسٹر علی ظفر نے کہا ہے کہ حکومت کو چاہئے کہ بیٹوں کو عمران خان سے ملنے دے ،بچے اپنی صوابدید پر تحریک میں شریک ہونا چاہیں تو کوئی روک نہیں سکتا ،مشیر وزیراعظم برائے سیاسی امور رانا ثناء اللہ نے کہا کہ عمران خان کے بیٹے اپنے والد سے ملنے آئیں یا سیاسی موومنٹ میں حصہ لیں ہمیں کوئی مسئلہ نہیں ،سنیئر رہنما پیپلز پارٹی سینیٹر سلیم مانڈوی والا نے کہا کہ ہمیں کوئی اعتراض نہیں ہے کہ قاسم یا سلیمان آکر جلسوں میں حصہ لیں۔ پارلیمانی لیڈر تحریک انصاف سینیٹر بیرسٹر علی ظفر نے کہا کہ جمائمہ کے ٹوئٹ سے واضح ہے کہ دونوں بچے اپنے باپ سے ملنے آرہے ہیں عمران خان سے جب میری ملاقات ہوتی تھی وہ یہی شکایت کرتے تھے کہ ہفتے میں ایک دفعہ بچوں سے بات کرنے کی اجازت ہے لیکن پھر بھی ان سے بات نہیں کروائی جارہی ہے تو اب ان کے بچے آرہے ہیں تو حکومت کو چاہیے کہ انہیں ملاقات کرنے دیں۔