توانائی شعبے میں پاک، روس اور نجی شعبوں کی فعال شمولیت حوصلہ افزا

اسلام آباد (صالح ظافر) وزیراعظم کے معاون خصوصی برائے امور خارجہ سید طارق فاطمی، جو روس کے دورے کے آخری مرحلے پر ہیں، نے اس بات پر زور دیا ہے کہ توانائی کے شعبے میں دونوں ممالک کی حکومتوں اور نجی شعبوں کی فعال شمولیت حوصلہ افزا ثابت ہو رہی ہے۔ ان کا کہنا ہے کہ اس تعاون کے نتائج دونوں ممالک کے لیے انتہائی مفید ثابت ہوں گے۔ انہوں نے اس بات پر زور دیا کہ توانائی دونوں ممالک کے درمیان تعاون کے اہم ترجیحی شعبوں میں سے ایک ہے۔ وزیراعظم کے معاون خصوصی برائے خارجہ امور نے جمعرات کے روز ماسکو میں روس کے پہلے نائب وزیر توانائی، پاویل سوروکِن سے ایک اہم ملاقات کی۔ میزبان نائب وزیر نے کہا کہ روس توانائی کے شعبے میں پاکستان کے ساتھ قریبی تعاون کا خواہاں ہے، جو اس سال اسلام آباد میں ہونے والے تجارت، اقتصادی، سائنسی اور تکنیکی تعاون پر پاکستان-روس بین الحکومتی کمیشن (IGC) کے 10ویں اجلاس کے ایجنڈے کا ایک اہم حصہ ہوگا۔