سعودی عرب اور پاکستان میں قیدیوں کے تبادلے پر عمل درآمد شروع

اسلام آباد (فاروق اقدس) سعودی عرب اور پاکستان میں قیدیوں کے تبادلے پر عملدرآمد کا آغاز ہو گیا، کوشش کی جا رہی ہے کہ مختلف جرائم میں جونی دس سال کی سزا کاٹ رہے ہیں وہ اپنی بقیہ قید اپنے ملک میں پوری کریں تاکہ انہیں اپنے عزیزو اقارب سے ملاقات کے مواقع حاصل ہو سکیں۔ اس حوالے سے نتیجہ خیز پیشرفت ہوئی ہے۔ یہ بات سعودی عرب میں پاکستان کے سفیر احمد فاروق نے جدہ میں پاکستانی قونصلیٹ میں میڈیا سے گفتگو کے دوران بتائی۔ ان کا کہنا تھا کہ وزیراعظم شہباز شریف نے مجموعی طور پر سعودی عرب کے 6دورے کئے ہیں اور ہر دورے میں سعودی ولی عہد و وزیراعظم شہزادہ محمد بن سلمان سے ہونیوالی ملاقات کے دوران سعودی عرب میں روزگار کے سلسلے میں مقیم پاکستانیوں کی مشکلات اور روزگار کے حوالے سے مواقعوں کی بات کی۔ یہی وجہ ہے کہ ہم نے متعلقہ ملک کے علاوہ جیلوں میں سزا پانے والے قیدیوں کے واقعات اور حالات جاننے کیلئے مسلسل رابطوں کا سلسلہ جاری رکھا ہوا ہے۔ ان کا کہنا تھا کہ دونوں ملکوں کے درمیان سیاسی تعلقات کے ساتھ ساتھ معاشی تعلقات میں بھی تسلسل کے ساتھ پیشرفت ہونی چاہئے کیونکہ سیاسی تعلقات بھی اسی صورت میں زیادہ مضبوط ہوتے ہیں جب معاشی رابطے مستحکم ہوں۔