حیدرآباد میں بادل پھٹ گیا، تیز بارش، 3 افراد جاں بحق، پنجاب میں موسلادھار بارشیں، 5 افراد جاں بحق

حیدرآباد (بیور ورپورٹ / جنگ نیوز ) حیدرآباد میں بادل پھٹ گیااور موسلادھار تیز بارش کے باعث ہر طرف پانی پانی ہوگیا ، سڑکیں تالاب بن گئیں ، بارش کا پانی اسپتال ، اسکول ، گھروں اور دکانوں میں داخل ہوگیا جبکہ ایک مکان کی چھت گرنے سے ایک شخص جاں بحق اور دیگر واقعات میں 2؍ افراد جاں بحق اور 3زخمی ہوگئے ، سب سے زیادہ بارش لطیف آباد میں 56ملی لیٹر ریکارڈ کی گئی ، آدھے گھنٹے کی بارش نے اداروں کے دعوؤں کی قلعی کھول دی ، شہر میں 220فیڈرز ٹرپ کرگئے اور شہر بجلی سے محروم رہا ۔ ڈپٹی کمشنر زین العابدین کا کہنا ہے کہ حیدرآباد شہر میں کلاؤڈ برسٹ ہوا ہے۔تاہم بعض میڈیا رپورٹس کے مطابق محکمہ موسمیات کا کہنا تھا کہ حیدرآباد میں کوئی بادل نہیں پھٹا۔ تفصیلات کے مطابق حیدرآباد شہر میں دوپہر 4بجے کے بعد شروع ہونے والی تیز ہواؤں کے ساتھ بارش نے شہر کو ڈبو دیا۔شہر کے تقریبا نشیبی علاقے زیر آب گئے ۔ ڈپٹی کمشنر زین العابدین کا کہنا ہے کہ حیدرآباد شہر میں کلاؤڈ برسٹ ہوا ہے، الرٹ جاری کیا ہے، پمپنگ اسٹیشنوں کو چلانے کی کوشش کررہے ہیں۔ ڈپٹی کمشنر کا کہنا ہے کہ پھلیلی نہر کی پانی کی سطح زیرو کرنے کیلئے محکمہ آبپاشی کو ہدایت کی ہے، بجلی کی عدم فراہمی کے باعث جنریٹر سے پانی کی نکاسی کررہے ہیں۔ ترجمان حیسکو کا کہنا ہے کہ حیدرآباد ریجن کے 220 فیڈر ٹرپ کرگئے۔