قلات، کراچی سے کوئٹہ جانیوالی بس پر فائرنگ، 3 مسافر جاں بحق، 16 زخمی

قلات (ایجنسیاں) قلات میں کراچی سے کوئٹہ جانیوالی مسافر کوچ پر فائرنگ‘دستی بم حملہ ‘ تین افرادجاںبحق‘16زخمی ‘دوکی حالت تشویشناک ہے ۔صدر مملکت آصف علی زرداری نے بزدلانہ دہشتگرد حملے کی شدید مذمت کرتے ہوئے کہا ہے کہ دہشتگرد انسانیت اور امن کے دشمن ہیں‘قوم کی حمایت سے دہشت گردی کے ناسور کا مکمل خاتمہ کریں گے جبکہ وزیراعظم شہباز شریف نے قلات میں مسافر بس پر فتنہ الہندوستان کے دہشت گردوں کی فائرنگ کے نتیجے میں معصوم شہریوں کی شہادت پر افسوس کا اظہار کرتے ہوئے کہا کہ معصوم اور نہتے شہریوں کی جان و مال کو نقصان پہنچانے والے دہشت گردوں کو بہت بھاری قیمت ادا کرنی پڑے گی۔پولیس کے مطابق مسافر کوچ کراچی سے کوئٹہ جارہی تھی کہ قلات کے قریب فائرنگ کی گئی ‘دہشت گردوں کے حملے میں 3 مسافرجاں بحق اور 10 زخمی ہوگئے جبکہ زخمیوں میں دو مسافروں کی حالت تشویشناک ہے۔پولیس کے مطابق لاشوں اور زخمیوں کوڈی ایچ کیوہسپتال منتقل کردیا گیا۔ دوسری جانب ترجمان بلوچستان حکومت نے کہا کہ ڈی ایچ کیو اسپتال قلات میں ایمرجنسی نافذ کردی گئی ہے، سکیورٹی فورسز نے علاقے کو گھیرے میں لیکر سرچ آپریشن شروع کردیاہے ۔