زرعی اراضی کی تیزی سے ہائوسنگ سوسائٹیوں میں تبدیلی ،فوڈ سکیورٹی کیلئے بڑا خطرہ

اسلام آباد( تنویر ہاشمی) زرعی اراضی کو تیزی سے ہائوسنگ سوسائٹیوں میں تبدیل کرنےکو فوڈ سکیورٹی کے لیے بڑا خطرہ قرار دے دیا گیا ،وفاقی وزیر منصوبہ بندی احسن اقبال نے گزشتہ 20 برسوں میں رہائشی سکیموں کی نذر ہونے والی زرعی اراضی کا مکمل ڈیٹا جمع کرنے کی چاروں صوبائی حکومتوں کو ہدایت کر دی تاکہ پالیسی سازی کے لئے جامع معلومات دستیاب ہوں،وفاقی وزیر نے پاکستان میں زرعی زمینوں کی تیزی سے کمی پر گہری تشویش کا اظہار کرتے ہوئے کہا کہ زرعی زمینوں کو برق رفتاری سے ہاؤسنگ سوسائٹیز میں تبدیل کرنےسے آنے والی نسل کو خوراک کیسے مہیا ہوگی؟ہمیں فوری طور پر اس رجحان کو روکنا ہوگا،انہوں نے کہا کہ اربن ڈویلپمنٹ کے لئے قانون سازی اور ایک نیشنل فریم ورک ناگزیر ہے۔ وفاق صوبوں کے ساتھ مل کر زرعی زمینوں کے تحفظ اور ماحول دوست شہری ترقی کے لئے جلد پالیسی مرتب کرے گا۔ احسن اقبال کی زیر صدارت زرعی زمینوں کو ہاؤسنگ سوسائٹیز میں تبدیل کرنے سے متعلق اہم اجلاس بدھ کوہوا ۔ اجلاس میں وفاقی و صوبائی اداروں کے اعلیٰ حکام، سی ڈی اے اور متعلقہ وزارتوں کے نمائندگان نے شرکت کی، احسن اقبال نےکہا کہ ملک میں بغیر منصوبہ بندی کے شہری پھیلاؤ بنیادی سہولیات کے بحران کو جنم دے رہا ہے اور اس کا اثر ماحولیاتی توازن پر بھی پڑ رہا ہے۔ انہوں نے زور دیا کہ ہم اپنی زرعی زمین کا بےدریغ استعمال کر کے دراصل اپنی خوراک کا مستقبل بیچ رہے ہیں،انہوں نے اسلام آباد میں فوری طور پر عمودی تعمیرات (Vertical Construction) کے آغاز پر زور دیا تاکہ شہری حدود میں ہی رہائشی ضروریات پوری کی جا سکیں۔انہوں نے درختوں کی بے دریغ کٹائی پر سخت قوانین کی ضرورت پر زور دیتے ہوئے کہا کہ ماحولیاتی تحفظ ہم سب کی اجتماعی ذمہ داری ہے۔