سینیٹ انتخابات کا انعقاد ممکن بنایا جائے الیکشن کمیشن کا پشاور ہائیکورٹ کو خط

اسلام آباد ( طاہر خلیل ) الیکشن کمیشن نے پشاور ہائیکورٹ کو خط لکھ دیا جس میں کہا گیا ہے کہ سینیٹ الیکشن کا انعقاد ممکن بنایا جائے۔الیکشن کمیشن نے پشاور ہائیکورٹ کے رجسٹرار کے نام خط میں لکھا ہے کہ سینیٹ الیکشن کاانعقاد ممکن بنایا جائے،سینیٹ انتخابات اور حلف برداری آئینی تقاضے ہیں۔الیکشن کمیشن نے خط میں درخواست کی ہے کہ چیف جسٹس پشاور ہائی کورٹ، آئین کے آرٹیکل 255(2) کے تحت کسی شخص کا انتخاب کریں تاکہ وہ پولنگ کی تاریخ سے پہلے خیبر پختونخوا صوبائی اسمبلی کے منتخب اراکین کو مخصوص نشستوں پر حلف دلائیں۔ الیکشن کمیشن 7 جولائی کو سینیٹ میں خیبر پختونخوا کی نشستوں پر انتخابات کے لیے امیدواروں کی فہرست جاری کرچکا ہے۔الیکشن کمیشن کے مطابق 27 مارچ، 2024 کو بننے والی فہرست ہی حتمی تصور کی جائے گی، سینیٹ انتخابات کے لیے کوئی نئے کاغذات نامزدگی نہیں ہوں گے۔الیکشن کمیشن نے صوبے کی 7 جنرل نشستوں کے لیے کل 16 امیدواروں کی فہرست جاری کی تھی، خواتین کی نشستوں کے لیے چار اور ٹیکنو کریٹ کے لئے 6 امیدوارفہرست میں شامل تھے۔قبل ازیں 4 جولائی کو الیکشن کمیشن نے سینیٹ کی خیبر پختونخوا کی 7 جنرل، 2 خواتین اور 2 ٹیکنوکریٹس کی نشستوں پر انتخابات کا شیڈول جاری کیا تھا جس کے مطابق پولنگ 21 جولائی کو صوبائی اسمبلی میں ہوگی۔