برسلز میں پاکستان اور یورپی یونین کے سیاسی مذاکرات

اسلام آباد(نمائندہ جنگ)برسلز میں پاکستان اور یورپی یونین کے درمیان دسویں سیاسی مذاکرات کا انعقاد ‘دو طرفہ اہم علاقائی اور عالمی امور پر تبادلہ خیال ‘جی ایس پی پلس کے تحت قریبی تعاون جاری رکھنے کے عزم کا اعادہ‘ فریقین نے ساتویں پاک،یورپی یونین اسٹریٹجک ڈائیلاگ کے جلد انعقاد پر بھی اتفاق کیا ۔پاکستانی وفد کی جانب سے مقبوضہ کشمیر کی صورتحال اور انسانی حقوق کی سنگین خلاف ورزیوں کے حوالے سے مفصل بریفنگ دی گئی ۔فریقین نے تنازعات کے پرامن حل کیلئے بات چیت اور سفارتکاری پر زوردیا ۔پاکستان و یورپی یونین کی جانب سے فوری جنگ بندی کے لئے غزہ پر مشترکہ اپیل اور فلسطین میں دیرپا اور منصفانہ امن کے لئے حمایت کا اعادہ کیا گیا۔ برسلز میں پاکستانی سفارتخانہ کی طرف سے جاری پریس ریلیز کے مطابق پاکستانی وفد کی قیادت سیکرٹری خارجہ آمنہ بلوچ جبکہ یورپی وفد کی قیادت ڈپٹی سیکرٹری جنرل یورپین ایکسٹرنل ایکشن سروس اولوف سکوگ نے کی۔ مذاکرات میں دو طرفہ، اہم علاقائی اور عالمی امور پر تبادلہ خیال کیا گیا۔ پاکستان اور یورپی یونین نے اسٹریٹجک انگیجمنٹ پلان (ایس ای پی)پر عملدرآمد کو یقینی بنانے کے عزمِ کا اظہار کیا۔