محکمہ صحت افسران و اہلکاروں کیلئے بائیومیٹرک حاضری لازم قرار

ملتان (سٹاف رپورٹر) محکمہ صحت و آبادی حکومت پنجاب نے صوبے بھر کے تمام افسران و اہلکاروں کے لیے بائیو میٹرک حاضری کو لازمی قرار دیتے ہوئے سختی سے عملدرآمد کی ہدایت جاری کر دی ہے،جاری کردہ حکم نامے میں کہا گیا ہے کہ دفتر میں حاضری اور روانگی دونوں اوقات پر بائیومیٹرک نظام کے ذریعے حاضری لگانا ضروری ہو گا، بصورت دیگر متعلقہ اہلکار کو غیر حاضر تصور کیا جائے گا،محکمہ صحت کی جانب سے جاری نوٹیفکیشن میں کہا گیا ہے کہ بعض افسران و ملازمین کی جانب سے سرکاری اوقاتِ کار کی پابندی نہ کرنے پر مجاز اتھارٹی نے گہری تشویش کا اظہار کیا ہے۔ اس لیے تمام دفاتر میں بائیومیٹرک حاضری کی مکمل پابندی کو یقینی بنایا جائے،تمام چیف ایگزیکٹو آفیسرز، ڈائریکٹرز، پروگرام انچارجز اور متعلقہ حکام کو اپنے دائرہ اختیار میں مکمل عملدرآمد کی ہدایت کی گئی ہے۔