مقبوضہ کشمیر:بھارتی فوج کی ریاستی دہشتگردی ، مزید 2نوجوان شہید،عبدالصمد انقلابی گرفتار

سرینگر(جنگ نیوز) مقبوضہ کشمیرمیں بھارتی فورسزکی ریاستی دہشت گردی میں مزید 2کشمیری نوجوان شہید ہوگئے،نوجوانوں کو نام نہاد سرچ آپریشن کے دوران پلواما میں شہید کیا گیا، بھارتی فوج نے لاشیں بھی قبضے میں لے لیں، اس کے علاوہ متعدد نوجوانوں کو گرفتار بھی کیا گیا ہے، قابض فوجیوں نے دوران آپریشن خواتین سے بدتمیزی بھی کی، حریت کانفرنس کے رہنما عبدالصمد انقلابی کوبانڈی پورہ میں ان کے گھر سے گرفتارکرلیا گیا ہے۔ تفصیلات کے مطابق قابض بھارتی فوج نے 2کشمیری نوجوانوں کوپلواما میں فائرنگ کرکے شہید کیا۔ بھارتی فورسزنے شہید نوجوانوں کی لاشیں بھی قبضے میں لے لیں۔رمضان کے مقدس مہینے میں بھی بھارتی فورسزنے پلواما اورقریبی علاقوں کا محاصرہ کررکھا ہے جس کی وجہ سے لوگوں کومشکلات کا سامنا ہے۔۔نام نہاد سرچ آپریشن کے دوران متعدد نوجوانوں کوگرفتارکرکے نامعلوم مقام پرمنتقل کردیا گیا۔بھارتی فوجی گھروں میں گھس گئے اورخواتین سے بدتمیزی کی اورہراساں کیا۔علاقے میں انٹرنیٹ اورموبائل سروس بھی بندکر دی گئی ۔دوسری جانب بھارت کی کٹھ پتلی انتظامیہ نے آل پارٹیز حریت کانفرنس کے رہنما عبدالصمد انقلابی کوبانڈی پورہ میں ان کے گھر سے گرفتارکرلیا۔