عمران نیازی ملک کو مارشل لاکی طرف دھکیلنے کے پلان پہ کام کر رہے ہیں ،احسن اقبال

لاہور(پی پی آ ئی) مسلم لیگ(ن) کے رہنما احسن اقبال نے کہا ہے کہ عمران نیازی نے امریکہ میں فارن فنڈنگ کیس میں انکوائیری اور پکڑے جانے کے خوف سے امریکہ سازش تھیوری گھڑ کے اپنی پیش بندی کی مگر ملک کی خارجہ پالیسی کو داؤ پہ لگا دیا۔ اپنے بیان میں لیگی رہنما احسن اقبال نے کہا ہے کہ قومی اسمبلی کا ڈپٹی سپیکر آئین توڑ سکتا ہے مگر پنجاب اسمبلی کا ڈپٹی سپیکر اجلاس نہیں بلا سکتا، پی ٹی آئی نے ملک اور آئین کا تماشہ بنانے میں کوئی کسر نہیں چھوڑ رہی۔انہوں نے کہا کہ عمران نیازی انارکی پیدا کر کے ملک کو مارشل لاکی طرف دھکیلنے کے پلان پہ کام کر رہا ہے،عدلیہ جو آئین کی نگہبان ہے اس کا یہ امتحان ہے کہ آئین جیتتا ہے یا ہارتا ہے؟ ،یہ آئین کی جیت یا ہار کا نہیں بلکہ ملک کی تقدیر کا فیصلہ ہے۔پنجاب اسمبلی کے اجلاس کے حوالے سے جو تماشہ کیا جا رہا ہے کون کہہ سکتا ہے کہ پاکستان میں آئین، قانون اور ضابطوں کی پرواہ رہ گئی ہے،ستم تو یہ ہے ایک طرف سپریم کورٹ ڈپٹی سپیکر قومی اسمبلی کے غیر آئینی اقدام کا جائزہ لے رہی ہے دوسری طرف سپیکر پنجاب اسمبلی آئین کی دھجیاں اڑا رہا ہے۔