صحافیوں کو پنجاب اسمبلی داخل ہونے سے روک دیا گیا

لاہور( این این آئی)پنجا ب اسمبلی سیکرٹریٹ نے صحافیوں کے داخلے پر مکمل پابندی عائد کر دی،میڈیا نمائندوں کو اسمبلی کے داخلی دروازے پر ہی روک دیا گیا جس کے خلاف صحافیوں نے شدید احتجاج کیا ۔ تفصیلات کے مطابق مختلف اخبارات اور ٹی وی چینلز کے نمائندے جب اپنی صحافتی ذمہ داریاں ادا کرنے کے لئے پنجاب اسمبلی پہنچے تو اسمبلی سیکورٹی اور پولیس نے انہیں داخلی دروازے پر ہی روک دیا اور بتایا کہ میڈیا کے اندر جانے پر پابندی ہے ۔ صحافیوں نے اسمبلی سیکرٹریٹ کے جاری کردہ ایکریڈیشن کارڈ دکھائے تو اس پر سیکورٹی نے بتایا کہ اسمبلی سیکرٹریٹ کا ہی حکم ہے کہ صحافیوں کے اندر داخلے پر پابندی ہے ۔ فیصلے کے خلاف صحافیوں شدید احتجاج کیا ۔دوسری جانب جب صحافیوں نے اس حوالے سے ڈپٹی سپیکر سردار دوست محمد مزاری سے رابطہ کیا تو انہوں نے کہا کہ جن لوگوں نے پابندی لگائی ہے یہ ان کا ظرف ہے ۔ جب ان سے پوچھا گیا کہ یہ پابندی کس نے لگائی تو انہوں نے کہا کہ آپ جن کا نام لے رہے ہیں پابندی انہوں نے ہی لگائی ہے ۔