آگرہ میں قید تین کشمیری طلبا کی ضمانت منظوری کے باجود رہائی نہ ہو سکی

آگرہ (کے پی آئی)بھارتی ریاست اتر پردیش کے شہر آگرہ میں بغاوت اور سائبر دہشت گردی کے ایک جھوٹے مقدمے میں قید تین کشمیری طلبا عدالت سے ضمانت منظور ہونے کے باوجود رہا نہیں ہوسکے ۔ الہ آباد ہائی کورٹ نے31مارچ کو شوکت احمد گنائی، ارشد یوسف اور عنایت الطاف شیخ کی ضمانت منظور کر کے ان کی رہائی کا حکم دیا تھا۔ جیل میں بند تین کشمیری طلبا کے وکیل نے صحافیوں کو بتایاکہ ایک ہفتہ گزرجانے کے بعد بھی وہ ابھی تک جیل سے باہر نہیں آئے کیونکہ کوئی مقامی باشندہ ضمانتی مچلکے پر دستخط کرنے کے لئے تیار نہیں ہے۔تینوں کشمیری طلبا کوجن کی عمریں 20سال کے قریب ہیں ،28اکتوبر 2021کو متحدہ عرب امارات میں ٹی ٹونٹی عالمی کپ کے ایک میچ میں بھارت کے خلاف پاکستان کی جیت پر خوشی کا اظہارکرنے پر گرفتار کیا گیا تھا۔انہیں بدھ کو الہ آباد ہائی کورٹ نے ضمانت دی تھی۔ انجینئرنگ کے طالب علم شوکت احمد گنائی کوکالج کے دو دوستوں ارشد یوسف اور عنایت الطاف شیخ کے ہمراہ میچ کے بعد وٹس ایپ سٹیٹس تبدیل کرنے اورپاکستان کے حق میں نعرے لگانے کے الزام میں گرفتارکیاگیا تھا۔