شام کاشورش زدہ شہرسویدا میں جنگ بندی کا اعلان ، فوج تعینات

کراچی (نیوز ڈیسک)شام کی حکومت نےشورش زدہ شہر سویدا میں متحارب فریقین کے درمیان جنگ بندی کا اعلان کرتے ہوئے فوج کی تعیناتی دوبارہ شروع کردی ہے،شہر میں حالیہ دنوں میں دروزی ،بدو مسلح گروہوں اور حکومتی افواج کے درمیان لڑائی میں سینکڑوں افراد ہلاک ہوچکےہیں۔ صدر احمد الشرح نے اسرائیلی مداخلت کو لڑائی کے دوبارہ بھڑکنے کی وجہ قرار دیا ہے۔فوج کی یہ تعیناتی ہفتے کے روز اس وقت ہوئی جب امریکہ نے اعلان کیا کہ اسرائیل اور شام نے جنگ بندی پر اتفاق کر لیا ہے۔ ملک کے صدر احمد الشرح نے ٹیلی ویژن پر اپنے خطاب میں کہا کہ انہیں سویدا میں ہونے والے واقعات میں مداخلت اور ملک میں سلامتی کی بحالی کیلئے بین الاقوامی سطح پر کالزموصول ہوئی ہیں ،انہوں نے مزید کہا کہ اسرائیلی مداخلت نے اس "کشیدگی کو دوبارہ بھڑکا دیا" ہے اور وہاں جاری لڑائی "ایک خطرناک موڑ" اختیار کر چکی ہے۔ صدر الشرح نے امریکہ کا اس کی حمایت پر شکریہ بھی ادا کیا۔ ایک سرکاری بیان میں کہا گیا ہے جنگ بندی کا اقدام "شامی خون کو بچانے، اتحاد کو برقرار رکھنے اور عوام کی حفاظت" کیلئے کیا جا رہا ہے۔