ڈیجیٹل بینک لائسنس کےحصول میں 20 اداروں کی دلچسپی

لاہور (سودی)سٹیٹ بینک نےڈیڈلائن کے مطابق ڈیجیٹل بینکوں کے لائسنسوںکیلئے درخواستیں وصول کرنے کا عمل مکمل کرلیا ۔درخواستوں کی وصولی میں زبردست ردعمل دیکھنے میں آیا اور ملکی کمرشل بینکوں، مائیکروفنانس بینکوں، الیکٹرانک منی انسٹی ٹیوشنز اور فن ٹیک اداروں سمیت متفرق درخواست دہندگان کی جانب سے 20 درخواستیں موصول ہوئیں۔ کچھ بیرونی اداروں نےبھی ، جو پہلے ہی بیرون ملک ڈیجیٹل بینکاری کے شعبے میں کام کررہے ہیں، پاکستانی مارکیٹ میں داخل ہونے میں دلچسپی ظاہر کی۔ اس سے قبل 3 جنوری 2022 کو سٹیٹ بینک نے ڈیجیٹل بینکوںکیلئے لائسنسنگ اور ضابطہ کاری فریم ورک جاری کیا تھا۔یہ فریم ورک صارفین کی سہولت کی بنیاد پرسستی ڈیجیٹل مالی خدمات فراہم کرتا ہے،اس کا بنیادی مقصد معاشرے کے ان طبقات کو مالی خدمات فراہم کرنا ہے جنہیں یہ سہولتیں میسر نہیں۔سٹیٹ بینک کی ٹیم تمام درخواست دہندگان کو درخواستوں کی تیاری اورجمع کرانے کیلئے درکار ضروری مدد اور سہولت بھی فراہم کی۔سٹیٹ بینک کے اس اقدام سے معاشرے کے ان طبقات کو مالی خدمات فراہم کرنے میں بے حد مدد ملے گی جنہیں یہ سہولتیں دستیاب نہیں یا کم دستیاب ہیں۔