کیا صرف پانچ خاندانوں کو سیاست کرنے کا حق ہے؟ ریحام خان

سکھر (بیورو رپورٹ) پاکستان ری پبلک پارٹی کی چیئر پرسن ریحام خان نے کہا ہے کہ متوسط طبقے کے مسائل حل کرانا ہمارا منشور ہے، کیا ملک میں صرف پانچ خاندانوں کو سیاست کرنے کاحق ہے؟ کبھی ایک پارٹی کے سربراہ کی بیٹی تو کبھی دوسری پارٹی کے سربراہ کا بیٹا اپنی باری لیتا ہے، عوام کو ریلیف دینے کی ضرورت ہے، ہم گالم گلوچ کی سیاست کو پسند نہیں کرتے، نوجوان طبقہ سب سمجھ رہا ہے، بینظیر انکم سپورٹ پروگرام کے پیسے بڑھانے یا لیپ ٹاپ تقسیم کرنے سے ملک ترقی نہیں کرے گا۔تبدیلی نہیں آئے گی، نہ ہی کوئی چاہتا ہے، البتہ بہتری کی خواہش ہے وہ آئیگی۔ ان خیالات کا اظہار انہوں نے سکھر پریس کلب میں پریس کانفرنس سے خطاب کرتے ہوئے کیا۔ انہوں نے کہاکہ موٹروے کی تعمیر پہلا ایجنڈا ہونا چاہیے، بلوچستان میں پراکسی وار چل رہی ہے، سندھ میں کچے کے حالات خراب ہے، ایف بی آر کی پالیسیوں سے ٹیکس دینے والا طبقہ پریشان ہے، کراچی میں احتجاج ہورہا ہے، بغیر اجازت کسی کو گرفتار کرنا بے عزتی ہے۔ پارٹی بناتے ہی الزامات کی بھرمار شروع ہوگئی ہے، کہا گیا کہ راولپنڈی کی حمایت ہے، مجھے عوام کے علاوہ کسی کی حمایت حاصل نہیں، پارٹی میں شامل ہونے کیلئے بہت سے لوگوں نے رابطہ کیا ہے، پی ٹی آئی کے لوگ مجھ سے ملنا چاہ رہے ہیں۔ انہوں نے کہاکہ پاکستان نے انڈیا سے جنگ جیتی، شاہینوں نے آسمان پر جبکہ میڈیا و سوشل میڈیا نے زمین پر بیانیہ کی جنگ جیتی، دنیا میں اپنا لوہا منوایا۔ میرا تعلق خیبرپختونخواہ سے ہے، مجھے اپنے علاقے کی خوبصورتی پر فخر ہے۔