جواری اپنے دو کمسن بچے جوئے میں ہار گیا

خانیوال(نمائندہ جنگ) جواری اور نشئی نے اپنے دو بچے جوئے میں ہار دیے جبکہ بیوی کو تشدد کر کے گھر سے نکال دیا، تفصیل کے مطابق نواحی علاقے بستی مولوی حیات والی میں اختر حسین گل نے مبینہ طور پر جوئے میں اپنے دو بچے ھار دئیے اور وہ جب ان بچوں کو جیتنے والے کے حوالے کرنے لگا تو بچوں کی ماں مبین اختر نر مزاحمت کی جس پر اختر گل نے اسے تشدد کا نشانہ بنایا۔مبین اختر نے اپنے والد اشفاق کو بلایا تو اختر گل نے اپنے دو بھائیوں صفدر گل اور عنصر گل کے ھمراہ اسے بھی تشدد کا نشانہ بنا کر بھگا دیا۔پولیس تھانہ کہنہ خانیوال نے پرچہ درج کر لیا ھے مگر اس میں بچوں کے جوئے میں ھارنے کا ذکر نہیں کیا۔بچوں کی ماں مبین اختر اور نانا اشفاق نے ان دفعات کو پرچے میں شامل کرنے کا مطالبہ کیا ھے۔