آبی ذخائر میں پانی کی صورتحال تسلی بخش،قابل استعمال ذخیرہ 82 لاکھ ایکڑ فٹ

اسلام آباد ( آن لا ئن ) ملک کے اہم آبی ذخائر میں پانی کی موجودہ صورتحال تسلی بخش ہے اور مجموعی قابل استعمال ذخیرہ 82 لاکھ 84ہزار ایکڑ فٹ تک پہنچ چکا ہے، جو فصلِ خریف کے لیے مثبت اشارہ ہے۔ واپڈا کے ترجمان کے مطابق، تربیلا، منگلا اور چشمہ ریزروائر میں پانی کی سطح اور اخراج معمول کے مطابق جاری ہے۔ ترجمان واپڈا نے بتایا کہ تربیلا کے مقام پر دریائے سندھ میں پانی کی آمد 2 لاکھ 60 ہزار 200 کیوسک جبکہ اخراج 2 لاکھ 59 ہزار 800 کیوسک ریکارڈ کیا گیا ہے۔ تربیلا ریزروائر میں آج پانی کی سطح 1530 . 00 فٹ اور پانی کا ذخیرہ 46 لاکھ 3 ہزار ایکڑ فٹ ہے۔ منگلا کے مقام پر دریائے جہلم میں پانی کی آمد 40 ہزار 100 کیوسک جبکہ اخراج صرف 8 ہزار کیوسک ہے۔ منگلا ریزروائر میں پانی کی سطح 1189 . 15 فٹ جبکہ ذخیرہ 36 لاکھ 2 ہزار ایکڑ فٹ تک پہنچ چکا ہے۔ دوسری جانب، چشمہ بیراج میں پانی کی آمد 3 لاکھ 30 ہزار 900 کیوسک اور اخراج 3 لاکھ 93 ہزار 400 کیوسک رہا، جبکہ چشمہ ریزروائر میں آج پانی کی سطح 642 . 70 فٹ اور پانی کا ذخیرہ 79 ہزار ایکڑ فٹ ریکارڈ کیا گیا۔ ہیڈ مرالہ کے مقام پر دریائے چناب میں پانی کی آمد 62 ہزار 500 کیوسک اور اخراج 39 ہزار 700 کیوسک رہا۔ نوشہرہ کے مقام پر دریائے کابل میں پانی کی آمد اور اخراج برابر یعنی 35 ہزار 600 کیوسک ریکارڈ کیا گیا۔ ترجمان واپڈا کے مطابق، ملک کے تین بڑے آبی ذخائر، تربیلا، منگلا اور چشمہ، میں قابل استعمال پانی کا مجموعی ذخیرہ اس وقت 82 لاکھ 84 ہزار ایکڑ فٹ تک پہنچ چکا ہے، جو کہ موجودہ موسمی صورتحال اور آئندہ زراعتی ضروریات کے لیے حوصلہ افزا قرار دیا جا رہا ہے۔