شفٹس کا تنازع،لندن میں ویک اینڈ پر ہڑتالوں کے دوسرے رائونڈ میں ٹریولرز کو شدید تعطل کا انتباہ

لندن (پی اے) لندن میں ٹریولرز کو متنبہ کیا گیا ہے کہ شفٹس کے تنازع پر جاری ہڑتالوں کے دوسرے رائونڈ میں انہیں اس ویک اینڈ پر شدید تعطل کا سامنا کرنا پڑ سکتا ہے۔ ریل، میری ٹائم اینڈ ٹرانسپورٹ (آر ایم ٹی) یونین کے ڈرائیورز جمعہ اور ہفتے کی شام سینٹرل اور وکٹوریہ لائنز پر آٹھ گھنٹوں کیلئے واک آئوٹ کریں گے۔ آر ایم ٹی نے کہا کہ ٹرانسپورٹ فار لندن (ٹی ایف ایل) نے پہلے کا معاہدہ پھاڑ دیا ہے جبکہ ٹی ایف ایل کا کہنا ہے کہ ڈرائیورز سال میں صرف چار راتیں کام کریں گے۔ اس کا مزید کہنا ہے کہ دیگر یونینز نے نئے روسٹرز سےاتفاق کیا ہے۔ گزشتہ جمعہ کو 24 گھنٹے کے واک آئوٹ سے دن بھر چھ لائنز پر شدید تعطل پیدا ہو گیا تھا۔ کورونا وائرس پینڈامک کے پھیلائو کے بعد گزشتہ اتوار کو وکٹوریہ اور سینٹرل لائنز پر پہلی ویک اینڈ اوور نائٹ سروس شروع ہوئی تھی لیکن اسے بھی صنعتی اقدام کی وجہ سے تعطل کا سامنا کرنا پڑا تھا۔ کرسمس رن اپ پر مزید ہڑتالوں کی پلاننگ کی گئی ہے۔