پنجاب، ٹوکن ٹیکس پر10،پراپرٹی ٹیکس پر 5فیصد رعایت

راولپنڈی (ساجد چوہدری )محکمہ ایکسائز اینڈ ٹیکسیشن پنجاب نے صوبہ بھر میں 31اگست تک گاڑیوں کے ٹوکن ٹیکس پر دس فیصد جبکہ پراپرٹی ٹیکس پر پانچ فیصد تک رعایت کا اعلان کیا ہے، گاڑیوں کے مالکان اور مالکان جائیداد سے کہا گیا ہے کہ وہ اس رعایت سے بھرپور فائدہ اٹھائیں ، ایکسائز حکام کے مطابق گاڑیوں کے ایسے مالکان جو انٹرنیٹ کا استعمال نہیں جانتے ان کی سہولت کیلئے راولپنڈی ایکسائز آفس میں ایک ڈیسک بھی قائم کر دیا گیا ہے جو شہریوں کو پی ایس آئی ڈی جنریٹ کروا کر دے گا اور جو شہری خود ہی انٹرنیٹ کے ذریعے پی ایس آئی ڈی پی جنریٹ کر سکتے ہیں وہ اپنے موبائل سے ہی ٹوکن ٹیکس کی آن لائن ادائیگی کرسکتے ہیں ،ڈائریکٹر ایکسائز اینڈ ٹیکسیشن راولپنڈی ڈویژن عمران اسلم کا اس حوالے سے کہنا ہے کہ رواں مالی سال 2025-26کے پراپرٹی ٹیکس جمع کروانے کیلئے پی ٹی5(چالان)کی تقسیم کا عمل شروع کر دیا گیا ہے ،ٹیکس دہندگان کو ان کے ایڈریس پر چالان بھجوائے جا رہے ہیں ، اگر ٹیکس دہندگان کو ان کا چالان کسی وجہ سے نہ مل سکے تو وہ ایکسائز آفس سے حاصل کرسکتے ہیں ، ڈی سی ریٹ کے مطابق پچاس لاکھ روپے مالیتی پراپرٹی پر پراپرٹی ٹیکس نہیں اس سے زیادہ مالیت کی جائیدادوں کے مالکان سے ٹیکس کی وصولی کا عمل جاری ہے ۔ ان کا کہنا ہے کہ پراپرٹی ٹیکس کی عدم ادائیگی کی صورت میں 31اگست کے بعد جہاں سرچارج لگنا شروع ہو جائے گا وہاں ٹیکس دہندگان کی جائیدادوں کو سربمہر کرنے کا عمل بھی شروع ہو جائے گا اور ٹوکن ٹیکس ڈیفالٹرز گاڑیوں کی پکڑ دھکڑ شروع ہو جائیگی ، لہٰذا شہریوں کو اپنے ذمہ ٹیکس کی بروقت ادائیگی کو یقینی بنانا چاہئے ۔