ڈیالہ جیل کے اردگرد اضافی پولیس نفری تعینات کردی گئی

راولپنڈی (سٹاف رپورٹر)پاکستان تحریک انصاف کے احتجاج کے حوالے سےاڈیالہ جیل کے اردگرد اضافی پولیس نفری تعینات کردی گئی ،جیل کی جانب آنے والے راستوں پر بنائے گئے ناکوں پر پولیس کو الرٹ کردیاگیا،اضافی نفری کی تعیناتی کے لئے پیر کو اڈیالہ جیل کے سپرنٹنڈنٹ عبدالغفور انجم نے سی پی او راولپنڈی کو خط لکھا تھا جس میں جیل کے باہر اور اردگرداضافی سیکیورٹی تعینات کرنے کی درخواست کی گئی تھی ،سپرنٹنڈنٹ اڈیالہ جیل کی جانب سے سی پی او راولپنڈی کو بھیجے گئے لیٹرمیں کہا گیا ہے کہ پی ٹی آئی نے 5 اگست کو جیل کے باہر مظاہرے کی منصوبہ بندی کی ہے، اڈیالہ جیل کے باہر اضافی پولیس تعینات کی جائے اور بیریئرز لگائے جائیں ،لیٹر میں کہا گیا ہے کہ سیاسی اور دہشت گرد قیدیوں کی موجودگی کے باعث اڈیالہ جیل انتہائی حساس ہے، جیل کے باہر غیر قانونی اجتماعات روکنے کےلیے کارروائی کی جائے، داہگل چیک پوسٹ سے اڈیالہ جیل کے گیٹ نمبر 5 تک اضافی سیکیورٹی تعینات کی جائے،انتظامیہ نے اڈیالہ جیل کے باہر احتجاج روکنے کیلئے دفعہ 144 نافذ کی ہے، اڈیالہ جیل میں 7ہزار 700 قیدی موجود ہیں جبکہ گنجائش صرف 2174 کی ہے، کسی بھی ناخوشگوار واقعے سے بچنے کیلئے سیکیورٹی کے فول پروف انتظامات کیے جائیں، سیکیورٹی کیلئے ہوم ڈپارٹمنٹ، آئی جی جیل خانہ جات اور آر پی او سے بھی درخواست کی گئی ہے،سی پی او راولپنڈی نے جیل سپرنٹنڈنٹ کی سفارش پر جیل کے اطراف اضافی نفری فراہم کرنے کاحکم دیا جس پر رات گئے ،اضافی نفری تعینات کردی گئی ہے ، جیل کی جانب آنے والے راستوں پر چیکنگ کاسلسلہ بھی شروع کردیاگیا ۔