یوم استحصال پر مسلح افواج کا کشمیری عوام سے مکمل اظہار یکجہتی

اسلام آباد (رپورٹ: حنیف خالد)یومِ استحصال کے موقع پر آرمی چیف فیلڈ مارشل سید عاصم منیر نشانِ امتیاز (ملٹری)، چیئرمین جوائنٹ چیفس آف اسٹاف کمیٹی، پاک بحریہ، پاک فضائیہ کے سربراہان اور پاکستان کی مسلح افواج نے بھارتی غیر قانونی زیرِ قبضہ جموں و کشمیر (IIOJK) کے دلیر، ثابت قدم اور مظلوم عوام کے ساتھ غیر متزلزل یکجہتی کا اظہار کرتے ہوئے ان کے ناقابل تنسیخ حقِ خودارادیت کی مکمل حمایت کا اعادہ کیا ہے، جو کہ بین الاقوامی قانون اور اقوامِ متحدہ کی سلامتی کونسل کی قراردادوں کے مطابق ہے۔ اعلامیے میں کہا گیا ہے کہ مقبوضہ کشمیر میں بھارتی افواج کی جانب سے مسلسل فوجی محاصرہ، منظم انسانی حقوق کی خلاف ورزیاں اور آبادی کا نسلی تناسب تبدیل کرنے جیسے اقدامات بین الاقوامی اصولوں کی سنگین خلاف ورزی ہیں اور پوری دنیا کے لیے تشویش کا باعث ہیں۔ بھارت کی جارحانہ پالیسی اور اشتعال انگیز بیانات نہ صرف انسانی المیے کو بڑھا رہے ہیں بلکہ پورے خطے کے امن کو بھی خطرے میں ڈال رہے ہیں۔ اعلامیے میں واضح کیا گیا کہ جنوبی ایشیا میں پائیدار امن کا خواب کشمیری عوام کی امنگوں اور اقوامِ متحدہ کی قراردادوں کے مطابق مسئلہ کشمیر کے منصفانہ اور پرامن حل کے بغیر ممکن نہیں۔ مسلح افواج نے مقبوضہ کشمیر کے شہداء کو خراجِ عقیدت پیش کرتے ہوئے اس عزم کا اعادہ کیا کہ وہ کشمیری بھائیوں کے ساتھ ان کی جدوجہدِ آزادی میں ہر قدم پر شانہ بشانہ کھڑے رہیں گے۔