دو سال میں بھی غلطی کا احساس نہ کرنے والا نتائج کا سامنا کرے ،رانا ثناء

لاہور(نمائندہ خصوصی،جنرل رپورٹر )وزیر اعظم کے مشیر مسلم لیگ (ن)پنجاب کے صدر رانا ثنا اللہ نے کہا ہے کہ دو سال میں بھی غلطی کا احساس نہ کرنے والا نتائج کا سامنا کرے،سیاست دانوں کو باہمی ڈائیلاگ سے جمہوریت کو آگے بڑھانا ہوگا۔ لاہور میں صوبائی الیکشن کمشنر پنجاب کو سینٹ کے ضمنی انتخاب کے لیے اپنے کاغذات نامزدگی داخل کرانے کے بعد انکے دفتر کے باہر میڈیا سے گفتگو کرتے ہوئے کہا ہے کہ 2 سال میں بھی غلطی کا احساس نہ کرنے والے شخص کو نتائج کا سامنا کرنا ہوگا، نااہلیاں سیاسی بنیادوں پر نہیں بلکہ مجرمانہ مقدمات پر ہوئیں۔9 مئی کے واقعات سے کوئی انکار نہیں کر سکتا،یہ عدالتی فیصلے ہیں اور سب کو انہیں ماننا ہوگا۔چالیس سالہ سیاسی زندگی کا نچوڑ ہے کہ سب کو سر جوڑ کر بیٹھنا چاہیے تاکہ ترقی یافتہ پاکستان بن سکے۔ سیاست دانوں کو باہمی ڈائیلاگ سے جمہوریت کو آگے بڑھانا ہوگامگر افسوس دوسری طرف سے بیٹھ کر بات کرنے کی تیاری نظر نہیں آتی۔