اسلام آباد ہائیکورٹ، مدثر نارو کو بازیاب ،13دسمبر کو پیش کرنیکا حکم

اسلام آباد (جنگ رپورٹر)اسلام آباد ہائیکورٹ نے تین سال سے لاپتہ مدثر نارو کو بازیاب کر کے 13 دسمبر کو پیش کرنے کا حکم جاری کرتے ہوئے قرار دیا ہے کہ وزیراعظم اپنے زیر کنٹرول ایجنسیوں کو مدثر نارو کو عدالت میں پیش یا ٹھکانے کاپتہ لگانے کی ہدایت کریں۔چیف جسٹس اطہر من اللہ کی عدالت سے10 صفحات پر مشتمل حکم نامہ میں عدالت کا یہ بھی کہناہے کہ وزیراعظم کے زیر کنٹرول ایجنسیوں پر الزام لگایا گیا کہ وہ بغیر کسی عمل کے شہریوں کی آزادی سے محرومی میں ملوث ہیں، لاپتہ شخص کا پتہ لگانا آئینی فرض ہے جس میں ناکامی کے ذمہ داروں کی نشاندہی اور ان کا جوابدہ ہونا ضروری ہے،وفاقی حکومت کی ذمہ داری ہے کہ وہ مطمئن کریں کہ ریاست یا ایجنسیاں لاپتہ شخص کو اغوا کرنے میں ملوث نہیں، اگر لاپتہ شخص کا پتہ نہیں چلتا تو وفاقی کابینہ ناکامی کے ذمہ دار اداروں کا پتہ لگا کر ان کے خلاف کارروائی سے آگاہ کریں،عدم بازیابی کی صورت میں اٹارنی جنرل پیش ہو کر اس سے متعلق وفاقی حکومت کی ذمہ داری سے آگاہ کریں،وزیر انسانی حقوق لاپتہ شخص کے والدین اور بچے کی وزیر اعظم سے ملاقات کو یقینی بنائیں،یہ معاملہ وزیراعظم اور وفاقی کابینہ ارکان کے سامنے رکھا جائے ۔