اسلام آباد ہائیکورٹ ؛ نیب دائرہ اختیار پر 15 روز میں فیصلے کی ہدایت

اسلام آباد (خبر نگار) اسلام آباد ہائیکورٹ کے کے جسٹس خادم حسین سومرو اور جسٹس محمد آصف پر مشتمل ڈویژن بنچ نے جعلی اکاؤنٹس کیس کے 2 ملزمان عبد الجبار اور نجم الزمان کی نیب دائرہ اختیار سے متعلق درخواستوں کی سماعت ملتوی کرتے ہوئے احتساب عدالت کو نیب ترامیم کی روشنی میں دائرہ اختیار پر 15 روز میں فیصلہ کرنے کی ہدایت جاری کر دی۔ عدالت نے کہا ہے کہ احتساب عدالت 15 روز میں فیصلہ کرے کہ یہ کیس کس عدالت کے دائرہ اختیار میں آتا ہے ،دوران سماعت درخواست گزار وکیل فاروق ایچ نائیک ایڈووکیٹ نے موقف اختیار کیا کہ نیب ترامیم کے بعد کیس سارے کراچی منتقل ہو گئے، کچھ مقدمات اینٹی کرپشن اور کچھ ایف آئی اے کو منتقل ہوئے، یہ دو مقدمات منتقل نہیں ہوئے، 11ماہ سے جج صاحب فیصلہ نہیں کر رہے، ملزمان کو کراچی سے آنا پڑتا ہے، انکے پاس اب کرائے کے پیسے نہیں ، جسٹس خادم حسین سومرو نے کمرہ عدالت میں موجود سپیشل پراسیکیوٹر نیب رافع مقصود سے استفسار کیاکہ آپ بتائیں یہ دائرہ اختیار پر کیوں فیصلہ نہیں ہو رہا۔ نیب پراسیکیوٹر رافع مقصود نے کہا کہ ان کی درخواستیں احتساب عدالت میں زیر سماعت ہیں۔ جسٹس خادم حسین سومرو نے کہاکہ ہم ٹرائل کورٹ کو ڈائریکشن دے رہے ہیں 15روز میں دائرہ اختیار پر فیصلہ کرے۔