علیمہ خان پر انڈا پھینکا جانا پاکستان میں آمرانہ سوچ کا نتیجہ ،تجزیہ کار

کراچی (ٹی وی رپورٹ) جیوکے پروگرام ”رپورٹ کارڈ“ میں میزبان علینہ فاروق نے کہاکہ اڈیالا جیل کے باہر علیمہ خان پر انڈا پھینکا گیا جس پر طلال چوہدری کہتے ہیں ہم اس واقعہ کی مذمت کرتے ہیں لیکن جو بدتمیزی کا کلچر تحریک انصاف نے بویا تھا آج انہیں اسی کا سامنا ہے کیا ان کی یہ بات درست ہے؟ جواب میں تجزیہ کار ارشاد بھٹی، بینظیر شاہ، مظہر عباس اور اعزاز سید نے کہا کہ علیمہ خان پر انڈا پھینکا جانا پاکستان میں آمرانہ سوچ کا نتیجہ ہے، یہ کلچر بھٹو کے دور میں شروع ہوا نواز شریف کے زمانے میں پروان چڑھا اور پی ٹی آئی نے اس میں چار چاند لگائے۔علیمہ خان پر انڈا نہیں پھینکا گیا یہ پاکستان میں ایک آمرانہ سوچ ہے جو ان چیزوں کے پیچھے بیٹھی ہوئی ہے جو کبھی مذہب ، کبھی سیاست اور کبھی صحافت کے لبادے میں لوگوں کو استعمال کرتے ہیں۔ آج ہر جماعت کے پاس اپنی بریگیڈ موجود ہے۔ طلال چوہدری آدھا سے بھی کم سچ بیان کر رہے ہیں۔ حقیقت یہ ہے کہ یہ کلچر گلوبل ہوچکا ہے۔ موبائل فون اور سوشل میڈیا نے ویڈیوز کے ذریعے ان رویوں کو مزید بڑھاوا دیا ہے۔