مہنگائی رجحانات پر نظر رکھنے کیلئے وزیر اعظم کی قائم کردہ سٹیئرنگ کمیٹی کا پہلا اجلاس

اسلام آباد(کامرس رپورٹر)وفاقی وزیر خزانہ سینیٹر محمد اورنگزیب کی زیر صدارت ملک میں مہنگائی کے رجحانات پر نظر رکھنے کیلئے وزیر اعظم کی قائم کردہ اسٹیئرنگ کمیٹی کا پہلا اجلاس اسلام آباد میں منعقد ہوا،اجلاس میں آنے والے دنوں میں مہنگائی پر ممکنہ طور پر اثر انداز ہو سکنے والے بنیادی ملکی و بین الاقوامی عوامل کا تفصیلی جائزہ لیا گیا۔ شرکاء نے اشیائے ضروریہ کی قیمتوں خاص طور حالیہ سیلاب کی روشنی میں ان کے غریب اور کم آمدنی والے طبقات پراثرات کا تفصیل سے جائزہ لیا۔اجلاس میں اشیائے ضروریہ کی قیمتوں اور بڑی فصلوں کی صورتحال کی باقاعدہ نگرانی کرنے اور ضرورت پڑنے پر صوبائی حکومتوں اور وفاقی اداروں کے ساتھ مل کر انتظامی اقدامات کی سفارش کرنے پر اتفاق کیا گیا۔ اجلاس کے دوران خاص طور پر اشیائے ضروریہ کی قیمتوں میں استحکام اور بالخصوص سیلاب سے متاثرہ علاقوں اور کمزور طبقوں پر اثر انداز ہونے والی اشیائے ضرویہ کی قیمتوں کی مسلسل نگرانی کا فیصلہ کیا گیا، وزیر خزانہ نے وزارتِ نیشنل فوڈ سکیورٹی اینڈ ریسرچ اور پاکستان ادارہ شماریات کو صوبوں کے ساتھ مل کر گندم، چاول اور چینی جیسے اہم غذائی اجناس کے دستیاب ذخائر کا فوری طور پر جائزہ لینے کہ ہدایت کی۔