حکومت نے بجلی کے قرض میں 50 ارب روپے کی کٹوتی کر دی

اسلام آباد (خالد مصطفیٰ) حکومت نے بجلی کے قرض میں 50 ارب روپے کی کٹوتی کر دی، قرضے کی مجموعی رقم 1.275 ٹریلین روپے سے کم ہوکر 1.225 ٹریلین روپے رہ گئی۔ تفصیلات کے مطابق پاکستان کے توانائی کے شعبے کی مالیات کو ازسرِ نو ترتیب دینے کے لیے ایک اہم اقدام کے تحت وفاقی حکومت نے اپنے مجوزہ قرضے میں 50 ارب روپے کی کمی کر دی ہے، جس سے قرضے کی مجموعی رقم 1.275 ٹریلین روپے سے کم ہوکر 1.225 ٹریلین روپے رہ گئی ہے۔ نظرثانی شدہ رقم اس وقت سامنے آئی جب پاور ہولڈنگ پرائیویٹ لمیٹڈ نے جزوی طور پر اپنی مالی ذمہ داریوں کو کم کیا اور متعدد اہم ادائیگیاں نمٹا دی گئیں، جس کے نتیجے میں مجموعی قرض کا بوجھ کم ہو گیا۔ سنٹرل پاور پرچیز ایجنسی کے بورڈ آف ڈائریکٹرز نے 18 کمرشل بینکوں کے کنسورشیم کے ساتھ نظرثانی شدہ قرض کی منظوری دے دی ہے۔ اب جبکہ وزیراعظم شہباز شریف اپنے چھ روزہ دورہ چین سے واپس آ چکے ہیں تو توقع ہے کہ یہ تقریب جلد ہی منعقد ہوگی۔ حکام کے مطابق قرض کی رقم پاور ہولڈنگ پرائیویٹ لمیٹڈ کو منتقل کی جائے گی تاکہ باقی ماندہ واجبات ادا کیے جا سکیں۔