امریکی شہریوں کی غیر قانونی گرفتاریاں، ایسے ممالک کو بلیک لسٹ کیا جائیگا، ٹرمپ کا ایگزیکٹیو آرڈر

کراچی (نیوز ڈیسک)امریکی صدر ٹرمپ نے غیر قانونی طور پر امریکی شہریوں کو حراست میں لینے والے ممالک کو بلیک لسٹ کرنے کے لیے ایک ایگزیکٹو آرڈر پر دستخط کردیئے ہیں۔صدر ٹرمپ نے ایک ایگزیکٹو آرڈر پر دستخط کیے جس کے تحت "غلط حراست کا ریاستی سرپرست" کی ایک نئی درجہ بندی قائم کی گئی ہے، اس اقدام کا مقصد ان ممالک پر دباؤ ڈالنا ہے جو غیر قانونی طور پر امریکیوں کو حراست میں لیتے ہیں۔ایک سینئر انتظامی اہلکار کے مطابق، یہ ایگزیکٹو آرڈر وزیر خارجہ مارکو روبیو کو نامزد ممالک پر پابندیاں عائد کرنے یا دیگر سزائیں دینے کا اختیار دے گا۔اعلان سے قبل صحافیوں کو بریفنگ دیتے ہوئے، ایک اہلکار نے نام ظاہر نہ کرنے کی شرط پر کہا، "آج ہم ایک بہت واضح لکیر کھینچ رہے ہیں، ریت پر ایک لکیر۔ آپ امریکیوں کو سودے بازی کے مہرے کے طور پر استعمال نہیں کرسکیں گے۔"اہلکار نے یہ بتانے سے انکار کر دیا کہ ٹرمپ انتظامیہ ان مجرم ممالک کے خلاف کتنی تیزی سے پابندیاں یا ویزا کی پابندیاں جاری کرے گی۔ بیرون ملک قید امریکیوں کی تعداد اور مقامات کے بارے میں تفصیلات امریکی حکومت کی طرف سے عام نہیں کی جاتیں۔ لیکن فولی فاؤنڈیشن کی 2024 کی رپورٹ کے مطابق، ایران، چین، روس، شمالی کوریا اور وینزویلا سمیت 17 ممالک میں 54 سے زائد امریکیوں کو یرغمال بنایا گیا یا غلط طریقے سے حراست میں لیا گیا۔