BISP کا بورڈ گزشتہ6ماہ سے غیر فعال ، اہم انتظامی و پالیسی فیصلے تاخیر کا شکار

اسلام آباد(تنویر ہاشمی ) بینظیر انکم سپورٹ پروگرام کابورڈ فروری 2025 سے غیر فعال ہے جس کے باعث بہت سے اہم اور نئے انتظامی وپالیسی فیصلے تاخیر کا شکار ہورہےہیں،ترجمان کے مطابق  دو سے تین  ممبران کی تعیناتی ہونا باقی، بورڈ کی منظوری صرف نئےاقدامات کیلئے  ضروری ہوتی ہے، ذرائع کے مطابق ملک کا سب سے بڑا سماجی تحفظ کا ادارہ بینظیر انکم سپورٹ پروگرام گزشتہ چھ ماہ سے زائد عرصے سے بغیر بورڈ ممبران کے چل رہا ہے، جو انتظامی اور قانونی حوالے سے خلاءہے ۔ذرائع کے مطابق ادارے کی پالیسی سازی، بجٹ ،منصوبہ بندی اور تمام نئے اقدامات کیلئے بورڈ کی منظوری درکار ہوتی ہے، تاہم فروری 2025 سے بورڈ کی عدم موجودگی کے باوجود بی آئی ایس پی کےمعاملات چلائے جا رہے ہیں، ذرائع کے مطابق بورڈ کی جلد از جلد تکمیل نہ صرف ادارے کی شفافیت اور فعالیت کیلئے ضروری ہے کیونکہ مستقل ملازمین کی کئی برسوں سے ترقی رکی ہوئی ہے اس اہم فیصلے کی منظوری بھی بورڈ نے دینی ہے، اس حوالے سے جب بینظیر انکم سپورٹ پروگرام کے ترجمان سے موقف کےلیے رابطہ کیاگیا تو انہوں نے بتایا کہ بورڈ کی منظوری صرف نئے اقدامات کیلئے ضروری ہوتی ہے، بی آئی ایس پی کا پروگرام بلاتعطل جاری ہے اور بی آئی ایس پی بورڈ کے ممبر کی تعیناتی کا عمل بھی زیر تکمیل ہے،دو سے تین ممبرز کی تعیناتی ہونا باقی ہے جو جلد کر لی جائے گی۔