وفاقی حکومت سول آرمڈفورسز کوفوج کی طرح خصوصی الاونس کی فراہمی کیلئے متحرک

اسلام آ باد ( رانا غلام قادر)وفاقی حکومت سول آرمڈفورسز کوفوج کی طرح خصوصی الاونس فراہم کرنےکے لیے متحرک ہوگئی ہے۔حکومتی ذرائع کےمطابق وفاقی وزارت داخلہ نےسول آرمڈکو50 فیصداور20فیصدخصوصی الاونس فراہم کرنےکے لیے سمری وزارت خزانہ کے ذریعےوزیراعظم کو بھجوادی،وزیر اعظم کی منظوری کےبعدسول آرمڈ فورسزکوخصوصی الاونس فراہم کیاجائے گا-ذرائع کےمطابق درخواست میں بیان کیا گیاکہ سول آرمڈ فورسزکے اہلکار ملک کی سرحدوں کی حفاظت، اندرونی سلامتی کےفرائض اور پاک فوج کے شانہ بشانہ مختلف آپریشنز میں خدمات انجام دے رہے ہیں،حکومت کےمختلف اہداف جیسے بارڈر مینجمنٹ اور دہشت گردی کے خلاف جنگ میں ان کی قربانیاں نمایاں ہیں-ذرائع کے مطابق درخواست میں بیان کیا گیا کہ سول آرمڈفورسزنےبطور فرنٹ لائن فورس اپنی ذمہ داریاں بخوبی نبھائی ہیں،خصوصاً حالیہ آپریشن "بنیان المرصوص" میں جہاں متعدد افسران اور جوانوں نے شہادت حاصل کی اورکئی شدید زخمی ہوئے،دہشت گردی کےخلاف لڑائی میں بڑی تعداد میں شہادتیں دی ہیں اور گراں قدر قربانیاں پیش کی ہیں،عام طور پر پاک فوج اور سول آرمڈ فورسزکے دستے ایک ہی مقام پرخدمات انجام دیتے ہیں-سول آرمڈ فورسزمیں سندھ رینجرز،پنجاب رینجرز،گلگت بلتستان اسکاوٹس، ایف سی ساوتھ اور ایف سی نارتھ خیبر پختون خواہ، ایف سی ساوتھ اورایف سی نارتھ بلوچستان،فیڈرل کانسٹیبلری اورپاکستان کوسٹ گارڈز شامل ہیں۔