نیپرا نے صنعتی کولڈ اسٹوریجز کو صنعتی ٹیرف میں منتقل کر دیا

اسلام آباد(اسرارخان) نیشنل الیکٹرک پاور ریگولیٹری اتھارٹی (نیپرا) نے فیصلہ دیا ہے کہ کولڈ اسٹوریجز جو پروسیسنگ، ویلیو ایڈیشن اور طویل مدتی ذخیرہ اندوزی میں استعمال ہو رہے ہیں، انہیں صنعتی ٹیرف پر بل کیا جائے گا، جب کہ صرف قلیل مدتی ریٹیل اسٹوریج کے لیے استعمال ہونے والی سہولیات تجارتی ٹیرف کے تحت ہی رہیں گی۔ یہ فیصلہ تمام ڈسٹری بیوشن کمپنیوں، بشمول کے-الیکٹرک، پر فوری طور پر لاگو ہوگا۔نیپرا نے یہ ترمیم اسٹیک ہولڈرز کی درخواستوں، وزارتِ خزانہ اور وزارتِ توانائی کی رائے لینے کے بعد کی۔ درخواست گزاروں نے موقف اختیار کیا کہ جدید کولڈ اسٹوریجز محض گودام نہیں بلکہ زراعت، خوراک، ماہی گیری، فارماسیوٹیکلز اور برآمدات میں اہم کردار ادا کرتے ہیں، اس لیے انہیں صنعتی حیثیت دی جانی چاہیے۔