خودمختار فلسطینی ریاست کو اپنا اسلحہ اور مزاحمتی نظام منتقل کر دیں گے،حماس کے سینئر رہنما موسیٰ ابو مرزوق

کراچی (نیوز ڈیسک) فلسطینی مزاحمتی تحریک حماس کے سینئر رہنما موسی ابو مرزوق نے اعلان کیا ہے کہ تحریک مستقبل میں قائم ہونے والی خودمختار فلسطینی ریاست کو اپنا اسلحہ اور مزاحمتی نظام منتقل کر دے گی، حماس کے ایک اور رہنما نے کہا ہے کہ قیدیوں کے تبادلے کا آغازجلد ہوگا۔قطر کے نشریاتی ادارے سے گفتگو کرتے ہوئے انہوں نے کہا کہ غزہ کا مستقبل ایک قومی مسئلہ ہے، جس کا فیصلہ صرف حماس نہیں کر سکتی۔ابو مرزوق نے واضح کیا کہ حماس نے امریکی صدر ڈونلڈ ٹرمپ کے امن منصوبے کے بنیادی خدوخال کو تسلیم کیا ہے، تاہم اس پر عملدرآمد کیلئے تفصیلی مذاکرات کی ضرورت ہے۔ حماس اپنی مزاحمتی قوت، اسلحے اور امن فورس سے متعلق تمام امور پر مذاکرات کرے گی۔انہوں نے مزید کہا کہ غزہ کی آئندہ حکومت کو اسلحہ منتقل کیا جائے گا اور تحریک کا مؤقف ہے کہ فلسطینی عوام کا مستقبل ایک قومی سوال ہے۔