’گلوبل صمود فلوٹیلا‘ کے گرفتار رکن نے اسرائیلی جیل میں اسلام قبول کرلیا

کراچی (نیوز ڈیسک) غزہ میں امداد لے جانے والے انسانی حقوق کے قافلے ’گلوبل صمود فلوٹیلا‘ کے گرفتار رکن نے اسرائیلی جیل میں اسلام قبول کرلیا۔ترک خبررساں ایجنسی کے مطابق فلوٹیلا میں شامل کشتی ’ماریا کرسٹن‘ کے اطالوی کپتان توماسو بورٹولازی نے اسرائیلی فوج کی جانب سے گرفتار کیے جانے کے بعد جیل میں اسلام قبول کرلیا۔ اسرائیلی جیل سے رہائی کے بعد ترکیہ پہنچنے پر میڈیا سے بات کرتے ہوئے توماسو نے کہاکہ وہ اس لیے فلوٹیلا میں شامل ہوئے کیونکہ ان کے خیال میں یہی وہ بہترین کام تھا جو وہ فلسطینیوں کے لیے کرسکتے تھے۔ توماسو نے کہا کہ اسرائیلی جیل میں گزرا وقت بہت ہی سخت تھا، ان کے ساتھی ترکیہ سے اور ان میں تقریباً سب ہی مسلمان تھے۔ توماسو کے مطابق ان کے ساتھی جب جیل میں نماز ادا کرتے تو اسرائیلی فوجی انہیں روکتے تھے، انہیں اسکی مخالفت کرنے کی ضرورت محسوس ہوئی اور انہوں نے کلمہ پڑھا۔ توماسو کا کہنا تھا کہ انہوں نے خود اس کا انتخاب کیا اور وہ بہت خوش ہیں، انہیں ایسا لگا جیسے ان کا دوسرا جنم ہوا ہے۔