گوادر:طوفان میں پھنس جانے والی 13کشتیوں کو بچالیا گیا

کوئٹہ ( نمائندہ جنگ)محکمہ فشریز اور میرین ٹیموں نے گوادر کے ساحلی علاقوں میں سمندری طوفان میں پھنس جانے والی 13کشتیوں کو بچالیا ۔ محکمہ فشریز حکام کے مطابق اتوار کی صبح ساحلِ اورماڑہ پر تیز ہواؤں اور سمندری طوفان (سائیکلون) کے باعث شدید صورتحال پیدا ہوئی۔ طوفان سے قبل محکمہ فشریز کی جانب سے مقامی ماہی گیروں کو بروقت خبردار کر دیا گیا تھا، اور سماجی رابطوں کے ذرائع سے پیغام جاری کیا گیا تھا کہ وہ گہرے سمندر میں نہ جائیں اور اپنی کشتیاں محفوظ مقام پر منتقل کر دیں۔تاہم واقعے کے وقت 13 مقامی چھوٹی کشتیاں ساحل کے قریب موجود تھیں۔ فشریز میرین ٹیمیں فوری طور پر موقع پر پہنچ گئیں اور 9 کشتیوں کو بحفاظت نکال لیا، جب کہ باقی کشتیاں مقامی ماہی گیروں اور دیگر امدادی افراد کی مدد سے بچا لی گئیں۔ریسکیو میں کسی جانی نقصان کی اطلاع نہیں ملی۔